Gott að vita til að stjórnmyndunarviðræðurnar gangi vel.

það hefur verið mikið rætt um stjórnarmyndunarviðræður þeirra Bjarna og Sigmundar.  Eins og flestir vita þá byrjuðu viðræður þeirra leynilega á stað sem landsmenn vissu ekki um, en seinna var upplýst að þeir héldu til í sumarbústað í eigu fjölskyldu Bjarna.  Mikið var um fréttaflutning af þessum viðræðum og ágiskanir fjölmiðlanna og hnýsni varðandi minnstu smáatriði, eins og innkaup þeirra í Krónunni.  Var margt spáð og spekúlerað, hvers vegna þeir völdu Krónuna til innkaupa og hvað þeir hefðu keypt.  Var sagt að réttast væri að kalla ríkisstjórn þeirra sem væntanlega verður afrakstur þessara viðræðna þeirra "Krónustjórnina".  Seinna kom fram að þeir voru að baka vöflur og snæða, sem var að vissu leiti rétt því í Mbl.is kom fram í  frétt að aðstoðarkona Bjarna hefði bakað vöflurnar fyrir þá félaga og fylgdi uppskrift af vöflunum.  Held ég að þessi fréttafllutningur hafi verið til þess gerður að skapa kátínu og góða stemmingu hjá fólki. 

Langar mig til að leggja mitt innlegg í gamanmálaumræðu þessa.  Mig langar til að varpa þessari spurningu fram:  Hvað keyptu þeir Bjarni og Sigmundur í Krónunni?  Ef mér skjátlast ekki þá hafa þeir þurft á meiri næringu að halda en vöflum og sultu gerðum aðallega úr sykri, hveiti og smjörlíki.  Mig skildi ekki undra þótt þeir hefðu einnig keypt eitthvað kjarnbetra og saðsamara vegna þeirrar mikilvægu og miklu vinnu sem þeir voru að takast á fyrir þjóðina.  Þar sem Sigmundur er formaður Framsóknarflokksins sem er oft bendlaður við  Íslensku bændastéttina þá grunar mig að þeir hafi keypt afurðir úr safni þess besta úr íslenskum landbúnaði eins og hangiálegg, skinku eða kjötmeti eins og grillkjöt. 

Varðandi vöflubaksturinn í sumarbústaðnum þá tel ég að þeir tvímenningar hefðu vel getað tekist vöflubaksturinn á hendur, en ef til vill hefði bökunartíminn á vöflunum verið æði misjafn því að í hugum þeirra er viðfangsefni þeirra Stjórnarmyndunarviðræðurnar þeim efst í huga.  Ég vil lýsa yfir ánægju minni með að þeir Sigmundur og Bjarni séu að vinna að því að mynda nýja ríkisstjórn og að allt virðist ganga vel.  Er gaman að sjá að þeir virðast vera klæddir í samskonar jakkaföt, eins og þeir séu í einum og sama flokknum.  Það er gott að sjá þá sameinast þjóðinni til handa til að vinna að heill hennar og velferð.

Kveðja að sunnan.

Fundað næst á morgun

Meirihluti landsmanna treystir hægristjórn til að koma á umbótum í landinu.

Mig langar til að lýsa yfir velþóknun minni á að Sigmundur Davíð  hefur snúið sér til Bjarna Benediktssonar með formlegar stjórnarmyndunarviðræður.  Hann sneri sér fyrst eins og alþjóð veit á vinstri vænginn eftir að hafa tekið við stjórnmyndunarumboði frá forseta Íslands.  það tel ég hafa verið til að skoða alla möguleika fyrst og vegna þeirrar kurteisi sem ég trúi að hann búi yfir sem hann vildi sýna formönnum hinna  framboðanna.  Eftir að hafa gengið á milli framboðanna með gottið sem hann hyggst færa Íslensku þjóðinni sem eru kosningaloforð hans og eftir að hafa kíkt á gottið sem hin á vinstri vængnum höfðu upp á að bjóða, sneri hann eftir nokkurn umhugsunartíma til Bjarna.  Þegar þangað var komið og eftir að hafa athugað gottið sem Bjarni hafði á boðstólunum ákváðu þeir að skiptast á molum, og setja þá saman í eina skál, en það eru aðgerðir þær sem þeir vonast til að bjóða fólkinu í Landinu. 

Ég vona innilega að þeir Sigmundur og Bjarni nái saman með góðar tillögur til handa þjóðinni og geti saman myndað nýja ríkisstjórn.  Að þjóðin geti komið til þeirra félaga að afloknum löngum kosningavetri og geti gætt sér á því sem þeir hafa upp á að bjóða.

Mig langar til þess að segja að þrátt fyrir að það langa tímabil sem Sjálfstæðisflokkur og Framsóknarflokkur voru saman í ríkisstjórn endaði með hruninu velþekkta þá voru tímarnir sem þeir voru í ríkisstjórn þeir blómlegustu hvað varðar efnahag fólks og lágri verðbólgu.  Kreppan kom yfir Evrópu og Norðurlöndin og fleiri svæði í heiminum með miklum þunga, þar á meðal á Íslandi.  Ég vil ekki segja að það hafi verið rétt að einkavæða bankana en það er ljóst að á þessum tíma sem einkavæðingin átti sér stað voru hugmyndir Kapítalismans í hámarki og hugmyndin um einkavæðingu að hún væri hagkvæm.  Stjórnarflokkar þeir sem tóku þessa ákvörðun höfðu að ég tel ekki hugmynd um hvað gæti gerst í sambandi við bankakerfið.  Á þessum tíma var efnishyggja á Íslandi og um allan heim vaxandi og Íslendingar tóku þátt í þeim dans kringum "Gullkálfinn".  Ég minnist þess að landsmenn voru að fjárfesta í hlutabréfum og ýmsum sjóðum bankanna grunlausir um hvað átti eftir að gerast.  Og svo kom hrunið.  Hæstvirtur forsætisráðherra á þessum tíma var ásamt öðrum úr þáverandi ríkisstjórn ásakaður um að hafa sýnt vanrækslu í starfi og leyft að hrun fjármálakerfisins ætti sér stað, sem er ekki rétt.  Því Landsdómur sem dæmdi í máli hans dæmdi hann saklausan af ákærum í hans garð.

Ég tel ekkert því til fyrirstöðu að Sjálfstæðisflokkur og Framsóknarflokkur myndi saman ríkisstjórn, og ég tel að ríkisstjórn þeirra verði happasæl fyrir landslýð.

Valið „enn hægt að endurskoða“

Sigmundur Davíð ætti að fara í stjórnmyndun með Sjálfstæðisflokknum.

Núna á vordögum þegar kosningar eru yfirstaðnar er það umhugsunarefni flestra að sjá hvernig stjórnarmyndunarviðræðum reiðir af.  Formaður Framsóknarflokks var eins og kunnugt  er í viðræðum við formenn Samfylkingar og Pírata í gær, og ekki er ljóst hvort að hann velji þá leið sem algengust er, sem er að fara í ríkisstjórnarsamstarf við þann flokk sem fékk mest fylgi í Alþingiskosningum.  Birgitta Jónsdóttir þingmaður Pírata tjáði sig í dag á Facebook síðu sinni að það væri mögulegt að útkoma stjórnarmyndunar mundi komi öllum á óvart.  Það er augljóst að fari Framsóknarflokkur í stjórnarsamstarf við einn eða tvo vinstriflokkanna þá yrði útkoman úr því minnihlutastjórn.

Minnihlutastjórnir eru eftir því sem ég best veit, sjaldgæfar í Þingsögu Íslands, en aðeins 4 slíkar stjórnir hafa setið á Lýðveldistímanum.  Slíkar stjórnir hafa eins og kunnugt er ekki öruggan þingmeirihluta á bak við sig og þurfa þvi að hafa óbeinan stuðning þingmanna úr öðrum flokkum til að verja sig fyrir hugsanlegu vantrausti.  Minnihlutastjórnir hafa yfirleitt setið stutt, að frátalinni síðustu ríkisstjórn.  Fyrsta slíka stjórnin var minnihlutastjórn Ólafar Thors 1949-1950 sem sat í 3 mánuði. 1958-1959 leiddi Emil Jónsson minnihlutastjórn Alþýðuflokks sem var varin af Sjálfstæðisflokki.  Sú stjórn sat í 11 mánuði.  1979-1980 leiddi Benedikt Gröndal minnihlutastjórn Alþýðuflokks sem sat í tæpa 4 mánuði.  Slíkar stjórnir hafa yfirleitt verið undanfari nánara samstarfs stjórnarflokks og þess flokks sem ver hana vantrausti, og eru yfirleitt taldar veikar stjórnir vegna þess að örðugt getur verið að koma málum í gegn um þingið.

Mig langar til að tjá mig um að mér þætti það eðlilegast og réttast að formaður Framsóknarflokks, Sigmundur Davíð Gunnlaugsson leitaði á náðir Bjarna Benediktssonar formanns Sjálfstæðisflokksins með stjórnarmyndun.  Það tel ég réttlátt gagnvart þeim mikla fjölda landsmanna sem greiddu Sjálfstæðisflokknum atkvæði sitt, vegna ábyrgðar þeirrar og útsjónarsemi sem þeir töldu að  flokkurinn hefði sýnt varðandi margvísleg mál almennings og fyrirtækja.

Mig langar til að lýsa yfir þeirri skoðun minni með fullri virðingu fyrir háttvirtum formanni Framsóknarflokksins að það sé heillavænlegast að snúa sér til Sjálfstæðismanna með stjórnarsamstarf.  Málsmetandi menn sem hafa tjáð sig í fjölmiðlum og á netinu hafa sagt að stefna Sjálfstæðisflokks varðandi húsnæðislán, aðgerðir til að létta til með fólkinu í landinu eins og skatta og virðisaukaskatts lækkanir og lækkun bensínverðs ofl. sé raunhæfari og ódýrari fyrir ríkissjóð en aðgerðir sem mörg hinna framboðanna boða.  Og eru mjög góður kostur fyrir fólk hvað afkomu snertir og eru framkvæmanlegar jafnvel nú þegar.  Ég vil hvetja háttvirtan formann Framsóknarflokksins að leita á náðir Sjálfstæðisflokksins sem trausts samstarfsaðila í næstu ríkisstjórn.  Ég geri fastlega ráð fyrir að formenn þessara flokka geti ef vilji er fyrir höndum komið sér saman um ásættanlega stefnu, fólkinu í landinu til handa.

Minnihlutastjórn möguleg?

Veljum stöðugleika og góð lífskjör fyrir alla í landinu.

 Í dag kjósum við til Alþingis 2013, þann flokk sem við treystum best.

Ég bið ykkur, kæru kjósendur að velja þann flokk sem býður upp á stöðugleika í fjármálum ríkisins, sem skilar sér í betri afkomu fyrir fólkið í landinu og atvinnulífið.

Sem býður raunhæfar lausnir í lánamálum heimilanna.  Lækkun á höfuðstól með skattaafslætti og enn meiri höfuðstólslækkun með séreignarsparnaði.  Vextir sambærilegir og í nágrannalöndunum. Verð og óverðtryggð lán og seinna ef  aðstæður leyfa afnám verðtryggingar.  Við þetta má bæta afnámi stimpilgjalda og að leifilegt sé að skila lyklum af húsnæði sé greiðslugeta óyfirstíganleg ásamt aðgerðum sem auðvelda eiga leið inn á fasteignamarkaðinn.

Sem býður raunhæfar lausnir fyrir atvinnulífið.  Afnám gjaldeyrishafta, lækkun skatta og gjalda, eflingu einkafaramtaks og nýsköpunar, minni ríkisafskipti og miðstýringu.  Og síðast en ekki síst stöðugt umhverfi fyirir atvinnulífið.

Sem býður raunhæfar lausnir fyrir alla landsmenn.  Lækkun tekjuskatts og virðisaukaskatts og lækkaðar álögur á bensíni.

Kjósum Sjálfstæðisflokkin (X-D) í dag! 

Landsmenn ganga að kjörborðinu

Jesús Kristur Guðs sonur öllum æðri.

Þegar Jesús var að koma að lokum 3 ára þjónustu sinnar hér á jörðu, sendu æðstu prestarnir og farísearnir þjóna til að handtaka Jesú.  Þeir komu til baka tómhentir, þeir höfðu ekki handtekið Jesú.  Vitnisburður þeirra sýndi að þeir höfðu orðið tilfinningalega, siðferðislega og andlega snertir af nærveru Jesú og því sem hann hafði að segja.  Þegar þeir voru spurðir "Hvers vegna komuð þér ekki með hann?" þá svöruðu þeir: "Aldrei hefur nokkur maður talað þannig."  Með því að heyra í Kristi og finna máttinn í orðum hans, fylltust þeir slíkri lotningu á honum og ótta, að þeir gátu ekki álitið hann vera illgjörðamann eða falskrist. 

Hann hafði eiginleika eins og: siðferðileg heilindi og guðlegt réttlæti sem gerðu hann ólíkan öllum öðrum mönnum, ólíkur Rabbínunum kennimönnum Gyðinga og spámönnunum sem voru sendir af Guði.  Það sem hann hélt fram og kenndi fór langt fram úr því sem Rabbínarnir höfðu  fram að færa.  Kennsla hans var þrungin sannleika og einlægrar ástar á Guði.  Hann var heill, heilagur í öllum sviðum lífs síns, hann hafði samúð með þeim sem höfðu fallið á einhvern hátt, eins og til dæmis tollheimtumönnum og bersyndugum.  Hann bauð þeim fyrirgefningu sína.

Þekking hans á lögmálinu , jafnvel þegar hann var aðeins 12 ára gerðu Rabbínana forviða.  Jesús átti ríkt bænasamfélag við Guð, hann beið hljóðlega og hægversklega en með krafti, hann fór oft upp á fjall til að biðjast fyrir.  Kraftaverkin sem  hann gerði tóku fram úr þeim kraftaverkum sem Elía og Elísa spámenn gerðu, slík Kraftaverk höfðu ekki sést í Ísrael í 15 aldir síðan brottför Ísraelsmanna úr Egyptalandi átti sér stað.  Þrátt fyrir það kallaði hann sjálfan sig hógværan og hann hrokaðist ekki upp.

Þótt hann væri maður, var hann einstækur og aðgreindur frá öllum öðrum.  Persónu eiginleikarnir sem hann bjó yfir og verkin sem hann gerði sýndu svo ekki var um villst að hann var Messías sem lofað hafði verið og sem koma átti í heiminn.  Þessir eiginleikar voru hans fullkomlega siðferðislega heill persónuleiki.  Hann var Messías, og hann var í heiminum;  Orðin hans, gerðir hans og hvernig hann lifði lífinu staðfestu guðlegt hlutverk hans og stöðu.  Í Guðs orði Jóhannesarguðspjalli 1:10-12 stendur:  "Hann var í heiminum, og heimurinn var orðinn til fyrir hann, en heimurinn þekkti hann ekki.  Hann kom til eignar sinnar, en hans eigin menn tóku ekki við honum.  En öllum þeim, sem tóku við honum, gaf hann rétt til að verð Guðs Börn, þeim er trúa á nafn hans."

Við skulum líta á: að hvaða leiti Jesú var einstakur:

1)  Hann er einstakur hvað persónuleika varðar.  Hebreabréfið 1:1-13. "Hann (Kristur) sem er ljómi dýrðar hans og ímynd veru hans (Guðs) og ber allt með orði máttar síns, hreinsaði oss af syndum vorum og settist til hægri handar hátigninni á hæðum." v3.

2)  Fæðing hans var einstök.  Lúkasarguðspjall 1:26-35  a) Hann var fæddur af mey sem Jesaja spámaður hafði spáð fyrir um 700 árum áður. b) Hann fæddist í Betlehem samkvæmt spádómi Míka 700 árum áður. c) Fæðing hans var kunngjörð af englum. d) Hann fæddist nokkrum vikum eftir fæðingu Jóhannesar, sem engllinn Gabríel sagði um að væri sá sem myndi ryðja brautina fyrir hann. e) Vitringar komu að veita honum lotningu þegar hann lá í jötu. f) Fæðing hans var kunngjörð með stjörnu sem birtist á himni. g) Herskarar engla lofuðu Guð við fæðingu hans. h) Heródes reyndi að myrða hann. i) Fæðing hans var fagnað af Símeon og Önnu sem sögðu hann vera Messías. í) Fyrir fæðingu hans gaf engill honum nafnið  Jesús, sem þýðir Guð frelsar.

3)  Þjónusta hans var einstök.  Markúsarguðspjall 1:21-28.   a) Hann var mesti kennari sem nokkru sinni hafði verið uppi.  b) Hann gerði meiri kraftaverk en nokkur annar hafði áður gert.  Hann gaf að eta 5000 manns og síðan öðrum 4000.  Hann lægði storm meira en einu sinni.  Lét mikinn fisk veiðast í net,  gekk á vatni, rak út illa anda, reisti Lazarus upp frá dauðum.  c) Hann læknaði fjölda fólks.  Hann lét blinda sjá, heyrnarlausa heyra, lamaða ganga.

4)  Hann var einstakur vegna þess hvernig hann dó og hvað gerðist við dauða hans.  Jóhannersarguðspjall 19:16-30 a) Sem Messías dó hann fyrir syndir fólksins, þar uppfyllti hann spádóm Davíðs skrifaðan 1000 árum áður, og spádóm Jesaja 700 árum áður, Sakaría 450 árum áður. b) Jesús spáði fyrir um dauða sinn. d) Lambið sem Ísraelsmenn slátruðu og átu og rjóðuðu blóðinu á dyrastafi húsa sinna áður en þeir gengu burt frá Egyptalandi var eins og táknmynd fyrir dauða Krists og að hann skildi úthella blóði sínu fyrir syndir mannkyns. c) Hann gaf líf sitt sjálfviljuglega. d) Guð huldi auglit sitt fyrir honum um stund, því að þótt hann hefði enga synd, tók hann synd alls heimsins á sig. e) Þótt hann þjáður væri bað hann bað Guð að fyrigefa óvinum sínum. f) Heilög og lýtalaus hegðun hans á krossinum, fékk annan ræningjann sem krossfestur með honum til að meðtaka hann sem frelsara og fá fyrirgefningu.

5)  Hann var einstakur þar sem hann reis upp frá dauðum.  Jóhannesarguðspjall 20:1-31 a) Hann reis upp samkvæmt spádómum Gamla Testamentisins. b) Hann spáði fyrir um upprisu sína. c) Hann reis upp þrátt fyrir að óvinirnir innsigluðu steininn sem lokaði gröf hans. d) Hann birtist fyrst konum. e) Hann birtist lærisveinum aftur og aftur í 40 daga.

6)  Hann var einstakur að því leiti að hann steig upp til himna.  Postulasagan 1:1-19. a)     Hann reis upp til himna, til að vera með föður sínum. b) Hann gaf lærisveinum sínum fyrirheit að þeir myndu fá kraft er Heilagur andi kæmi yfir þá. d) Hann gaf lærisveinum sínum skipun um að prédikka fagnaðarerindið í Jerúsalem og út um allan heim. e)  Hann settist við hægri hönd föðurins.

7)  Hann er einstakur því hann mun koma aftur.   Matteusarguðspjall 16:27. "Mannssonurinn mun koma í dýrð föður síns með englum sínum, og þá mun hann gjalda sérhverjum eftir breytni hans."   a) Hann mun ekki koma í þetta sinn sem lamb leitt til slátrunar, heldur í krafti og hátign sem "ljónið af Júda ættkvísl" opinberunarbókin 5:5. b) Hann mun reisa upp þá sem dánir eru í trú á Krist, og síðan munu þeir sem á lífi eru og trúa á hann vera "hrifnir burt í skýjum til fundar við Drottinn í loftinu" og munu vera með Drottni alla tíma. c) Koma Drottins Jesú verður "Eins og þjófur um nótt" Matteus 24:36;42-44 ,"daginn eða stundina veit enginn" Matteus 24:36-44 d) Hann mun stofna 1000 ára friðarríkið á jörðu sem lofað hafði verið  e) Hann mun binda enda á hið illa.

Jesús mun koma aftur til að hrífa burtu þá sem trúa á hann, bæði þá sem "sofnaðir eru" og hina sem eru á lífi við komu hans.  "Ekki viljum vér, bræður, láta yður vera ókunnugt um þá, sem sofnaðir eru til þess að þér séuð ekki hryggir eins og hinir, sem ekki hafa von.  Því að ef vér trúum því að Jesús sé dáinn og upptrisinn, þá mun Guð fyrir Jesú leiða ásamt honum fram þá, sem sofnaðir eru.  Því það segjum vér yður, og það er orð Drottins, að vér, sem verðum eftir á lífi við komu Drottins, munum alls ekki fyrri verða en hinir sofnuðu.  Því að sjálfur Drottinn mun stíga niður af himni með kalli, með höfuðengils raust og með básúnu Guðs, og þeir , sem dánir eru í trú á Krist, munu fyrst upp rísa.  Síðan munum vér, sem eftir lifum, verða ásamt þeim hrifnir burt í skýjum til fundar við Drottinn í loftinu.  Síðan munum vér vera með Drottni alla tíma."     1 Þessalonikubréf 4:13-17. 

Kæru landsmenn!  Guðs orð segir að það muni koma mikil "þrenging" yfir Jörðina.  Guðs orð segir að á þessum tíma sem burthrifning hinna trúuðu á sér stað muni "þrengingin mikla" sem Biblían talar um vera skollin yfir heimsbyggðina.  "Það mun vera sú mesta þrenging sem engin hefur þvílík verið frá upphafi heims allt til þessa og mun aldrei verða" sagði Jesús um þessa viðburði. Og hann bætti við:  "Ef þessir dagar hefðu ekki verið styttir, kæmist enginn maður af.  En vegna hinna útvöldu munu þeir dagar styttir verða"  Matterusarguðspjall 24:21 og 22. 

Guðs orð segir að "Dagur Drottins komi sem þjófur á nóttu " þegar enginn á hans von.  Enginn veit daginn eða stundina heldur aðeins Guð Faðirinn á himnum.  Kæru landsmenn snúið yður til Jesú Krists sonar Guðs á meðan tími er til.  Svo þér mættuð frelsast og fá syndir yðar fyrirgefnar og eignast frið við Guð fyrir fórnarverk Jesú Krists sem hann vann á Krossinum!

Varðandi þrenginguna miklu og undanfara hennar og burthrifninguna þá er það mál það yfirgripsmikið að ég útlista það ekki frekar hér heldur er það efni í aðra bloggfærslu.

 

 

 

 

Öflugt atvinnulíf er undirstaðan fyrir bættum lífskjörum á Íslandi.

Ég tel að Sjálfstæðisflokkurinn eigi skilið að landsmenn ljái flokknum atkvæði sitt á laugardaginn.  Því flokkurinn leggur mikla áherslu á uppbyggingu Íslensks atvinnulífs, sem undirstöðu undir uppbyggingu lífskjara hérna í landinu og bætts efnahags ríkissjóðs.   Án innspítingar í atvinnulífið og fjárfestingar og nýsköpunar, nær atvinnulífið ekki að ná sér á strik með fjölgun starfa hækkandi launum og bættrar afkomu fólksins í landinu.  En ég tel að Sjálfstæðisflokkurinn undir forystu Bjarna Benediktssonar hafi þarna innsæi og skíra mynd af því til hvaða aðgerða beri að taka atvinnuvegunum til viðreisnar.

Aðgerðir þær sem Sjálfstæðisflokksmenn boða til að létta til með fólki með húsnæðislán eru ekki óraunhæfar eða of dýrar með tilliti til gengis ríkissjóðs.  Heldur eru þær framkvæmanlegar nú þegar og eru þegar allt er meðtalið sem flokkurinn býður eins og lækkun skatta, virðisaukaskatts og bensíns,  mjög góður kostur fyrir fólk.

Framsókn stærst í könnun Stöðvar 2

Hvers vegna að ljúka aðildarviðræðum, þar sem þjóðin er andvíg aðild að ESB ?

Núna í aðdraganda kosninga er mikið rætt um stjórnmál og stefnur hinna mismunandi flokka og framboða.  Umræðuþættir eru sýndir í sjónvarpi við frambjóðendur og skoðanakannanir eru birtar til að sýna nýjustu tölur af fylgi.  Niðurstöður þessara skoðanakannana hafa sýnt fram á mikil stökk upp og niður í fylgi margra framboðanna.

Í dag greindi Fréttablaðið frá því að fylgi stóru flokkanna, Framsóknarflokks og Sjálfstæðisflokks hafi minnkað frá síðustu skoðanakönnun sem gerð var í síðustu viku.  Fylgi Sjálfstæðisflokks mældist 23,8% og Framsóknarflokks 25,8%, fylgi Vinstri Grænna hefur hins vegar aukist og mælist nú 10,4%.

Ég tel að ástæðan fyrir þessu minnkandi fylgi vera tvímælalaust vegna þess að í umræðuþætti stöðvar 2 vegna Alþingiskosninga 2013, áttu talsmenn Framsóknar og Sjálfstæðisflokks í mestu vandræðum með að svara þeirri spurningu sem beint var til þeirra, hvort flokkar þeirra ætli að standa við eigin stefnu varðandi að hætta beri aðildarviðræðum við ESB.  En samkvæmt skoðanakönnunum Félagsvísindastofnunar og Háskóla Íslands, vill meirihluti þjóðarinnar  52,7%  ljúka aðildarviðræðum, á móti 30,7 sem vilja hætta þeim.

Ég tel að Framsókn og Sjálfstæðismenn ættu ekki að skammast sín fyrir, eða vera hræddir við að játa yfirlýsta stefnu sína í þessum efnum.  Ég tel það vera af vanhugsuðu máli sem landsmenn vilja ljúka aðildarviðræðunum við ESB.  Ég álít að það sé engin ástæða til að "ljúka þessu máli" eins og sumt fólk lýsir yfir.  Meirihluti Landsmanna kærir sig ekki um aðild að ESB, og hvers vegna þá að klára aðildarviðræðurnar þar sem þær eru mjög kostnaðarsamar, og taka mikið af tíma ráðamanna sem með þetta mál fara, tíma sem nýst gæti til uppbyggilegri hluta?

Ég vil segja að fólk ætti ekki að vera hrætt við að ljá þessum tveimur flokkum atkvæði sitt, vegna þessa tiltekna máls, sem rætt var um í viðræðuþætti stöðvar 2.  Ég tel að þetta mál skipti í raun mjög litlu máli, ég treysti Sjálfstæðismönnum vel til að  taka að sér það vandasama verkefni að fara með stjórn Landsins okkar,  Íslands.

Ég tel að við eigum ekkert erindi í ESB.  Með inngöngu í sambandið færist valdið yfir veigamiklum  þáttum fullveldis okkar yfir til Brussel, en það er meðal annars:

1.  Yfirráðin yfir 200 mílna fiskveiðilögsögu.

2.  Rétturinn til að gera fiskveiðisamninga við önnur riki.

3   Rétturinn til að gera viðskiptasamninga við önnur ríki.

4.  Réttur til að leggja á tolla eða afnema tolla.

5  Æðsta dómsvald framselt til ESB-dómstólsins, sem útheimtir breytingu á stjórnarskrá Íslands.

Og þannig mætti lengi telja.  Við skulum minnast þess að einmitt í krafti sjálfstæðis síns bætti þjóðin lífskjör sín frá því að vera ein fátækasta þjóð Evrópu til að vera ein sú ríkasta.  Við Íslendingar ættum ekki að taka ákvörðun um ESB aðild út frá skammtímasjónarmiðum eins og aðsteðjandi kreppu eða bágs gengis Krónunnar.  Leyfum komandi kynslóðum að njóta þeirra forréttinda að búa í landi sem laust er við erlend yfirráð.

Ég hvet ykkur til að velja þann stjórnmálaflokk sem hefur þá yfirlýstu stefnu að Ísland verði utan ESB, sem býður raunhæfar lausnir til handa skuldara íbúðalána, býður lækkaða skatta og gjöld Heimilunum og Atvinnulífinu til hagsbóta.

Veljið Sjálfstæðisflokkinn (X-D) í næstu kosningum!

Fylgi stóru flokkanna minnkar

Bætt fylgi Sjálfstæðisflokksins er gleðiefni.

Eftir rúma viku göngum við til kosninga.  Munum við þá velja þann flokk sem við teljum best treystandi til að taka að sér stjórn landsins okkar.  Þá kemur upp í hugann það sem okkur finnst brýnast að komandi ríkisstjórn geri fyrir okkur.  Lánamál heimilanna hafa þarna verið efst á baugi hjá allflestum landsmanna.  Lausnir framboðanna eru margs konar í þessum viðkvæma málaflokki.  Hefur oft verið talað um að lausnir sumra framboðanna séu óraunhæfar miðað við hvernig staða ríkissjóðs er núna.  Samkvæmt skoðanakönnunum undanfarnar vikur eru þeir flokkar sem njóta mest fylgis Framsóknarflokkur og Sjálfstæðisflokkur.

Samkvæmt skoðanakönnun Gallup í dag er fylgi Sjálfstæðisflokksins 24% á móti 27% hjá Framsókn, og að skoðanakönnun MMR sýndi fram á meira fylgi hjá Sjálfstæðisflokki en hjá Framsókn.  Kemur fram á MBL.IS að aukið fylgi hjá Sjálfstæðisflokknum sé vegna þess að fyrrum fylgjendur flokksins séu að "snúa heim".

Það vill oft verða svo að menn láta glepjast þegar glæsi tilboð berast þeim.  Og raunin varð sú að:  Í þoku og illviðri, innistæðulítilla kosningaloforða hinna framboðanna, villtust sumir fylgjendur Sjálfstæðisflokksins í burtu frá flokknum.  Eins og oft vill brenna við hjá okkur mannfólkinu þá var grasið í þeirra huga, grænna hinum meginn.  En góðu heilli, virðast þeir nú hafa áttað sig, og eru nú að snúa heim,  heim til heimastöðvanna,  Sjálfstæðisflokksins.

Sjálfstæðisflokkurinn býður raunhæfar lausnir í húsnæðislánum, þær eru að sögn Sjálfstæðismanna hvorki of íþyngjandi fyrir þjóðarbúið né skapa þær óstöðugleika né mikla verðbólgu.  Þær virðast í fyrstu sýn vera umfangsminni en þær lausnir sem td. Framsóknarflokkurinn eða Samfylkingin hafa upp á að bjóða.  En þegar grannt er skoðað sjáum við að þeim til viðbótar eru aðgerðir sem flokkurinn hyggst  framkvæmda til að létta til með heimilunum (Lækkun tekju- og virðisaukaskatts og lækkun bensínverðs), sem gerir það að verkum að á heildina er litið eru lausnir flokksins heimilunum til handa verulega álitlegur kostur.  (Lausnir varðandi lánamál heimilanna eru ma: Stimpilgjöld afnumin, skattaafsláttur af greiðslum inná lán, hluti séreignarsparnaðar renni til innborgunar á láni, boðið upp á verðtryggð og óverðtryggð lán, að vaxtaprósenta verði sambærileg og í nágrannalöndunum, minnkandi vægi verðtryggingar, og ef aðstæður leyfa verði verðtrygging afnumin)

Aðgerðir fyrir fyrirtækin og atvinnulífið í landinu eru að ég tel vel úthugsaðar lausnir, vel til þess fallnar að koma atvinnulífinu á skrið aftur og skapa hér velmegun í landinu.  Því undirstaðan fyrir góðu gengi ríkisjóðs og fyrir bættum lífskjörum fólksins í landinu er öflugur atvinnuvegur ásamt fjárfestingu og nýsköpun.  (Meðal þessara aðgerða eru:  Afnám gjaldeyrishafta, lægri skattar og gjöld til fyrirtækja, minni ríkisafskipti og miðstýring, stöðugt umhverfi fyrir atvinnulífið með fjölgun starfa og hækkandi launum).

Ég vil hvetja þig til þess að ljá atkvæði þitt þeim flokki sem býður upp á raunhæfar lausnir fyrir fólkið í landinu til bættra lífskjara.

 

 

 

Framsókn stærst í könnun Gallup

Hugleiðing um Kristna trú og stjórnmál.

Núna þegar styttist í kosningar er gott að leiða hugann að því hvað það er sem helst fær eflt hag Íslensku þjóðarinnar og fólksins í landinu.  Stjórnmálaflokkar og framboð hafa margar góðar lausnir sem fært geta okkur margskonar umbætur á ýmsum sviðum lífs okkar og afkomu.   Það er eitt sem ekki má gleymast í öllu sem við tökum okkur fyrir hendur í dagsins önnum, í vinnu og leik og núna í aðdraganda kosninga, en það er: Guð almáttugur skapari himins og jarðar sem vill og er fær um að hjálpa okkur.  Hann sendi okkur son sinn Jesú Krist, til að koma sem lítið barn, lifa á meðal manna, kenna okkur veginn til hjálpræðis og hvernig við eigum að haga lífum okkar og síðan að vera deyddur, krossfestur fyrir syndir okkar og að síðustu að rísa upp á þriðja degi.  Í trúnni á hann höfum við öruggan aðgang að Guði og getum komið til hans með það sem okkur liggur á hjarta, getum beðið til hans og ef við biðjum samkvæmt hans vilja bænheyrir hann okkur.

Ég tel að Kristin  trú og Kristin gildi séu eins og meira óljós í hugum margra landsmanna en fyrir nokkrum árum og áratugum.  Kristinni trú í þjóðfélaginu hefur verið, eins og ýtt til hliðar í sumum þáttum mannlífsins.  Kristilegri kennslu og Kristilegum áhrifum hefur veið eins og meira og meira ýtt út úr skólakerfinu.  Kristnifræðikennsla í Grunnskólum er ekki eins góð og ýtarleg og þegar sá er þetta ritar var í skóla, og það má segja að Kristin trú sé núna aðeins kynnt lítillega ásamt öðrum trúarbrögðum í skólum landsins.  Heimsóknir Presta og Gídeonmanna og annara sem boða fagnaðarerindið eru ekki leyfðar í mörgum grunnskólum landsins. 

Mér finnst að þar sem Kristin trú hafi að einhverju leiti verið á undanhaldi á Íslandi þá hafi almennu siðferði hnignað í samfélagi okkar á síðustu árum og áratugum.  Ég sé það í mörgum þáttum mannlífsins, eins og framkomu fólks manna á milli, maður heyrir það í fréttum að fólk eigi í útistöðum hvert við annað meira en áður var.  Hegðun fólks á netinu er líka oft á tíðum mjög slæm, tíðni glæpa þar á meðal nauðgana og ofbeldis, hefur aldrei verið eins mikil og undanfarin ár, fólk ber minni virðingu fyrir valdhöfum og hegðun fólks á Alþingi Íslendinga er ekki eins og við áttum að venjast fyrir nokkrum árum.

Mér finnst að Kristin trú sé eins og meðalið við þessu öllu.  Að hún sé eins og saltið sem Jesús Kristur talaði um, sem kemur í veg fyrir siðspillinguna og hnignunina í þjóðfélaginu.  Í Biblíunni, Guðs orði stendur:

"Þér eruð salt jarðar.  Ef saltið dofnar, með hverju á að selta það?  það er þá til einskis nýtt, menn fleygja því og troða undir fótum."  Matteus 5:13  Guðs orðið kennir okkur að greina gott frá illu og feta hinn rétta veg, og að lifa hvern dag öðrum til blessunar.

Ég vil hvetja alla sem starfa að stjórnmálum og alla þá sem þetta lesa, að koma með málefni og vandamál líðandi stundar til Guðs, og treysta á hann sem skapað hefur alla hluti og allt vald hefur á himni og jörðu.  Það mundi verða þeim og þjóðinni til mikillar gæfu og blessunar.  Mættu Kristin trú og Kristin gildi ráða í gjörðum þeirra sem að stjórn Íslensku þóðarinnar koma eftir næstu kosningar og mættu Kristin gildi ráða við gerð laga í stjórnkerfinu.  Mig langar til að segja að Jesús Kristur og trúin á hann er besta lausnin fyrir Íslendinga og allan heiminn.

Jesús Kristur, Guðs sonur dó á krossi fyrir þig til að borga gjaldið fyrir syndir þínar. 

Þegar hann var í Getsemanegarðinum, áður en hann var krossfestur, vissi hann hvað yfir hann mundi koma, og hugsunin um að mega sleppa frá þessu öllu, þar meina ég krossfestingunni, kom upp í huga hans.  Hann bað til föður síns:  "Ef verða má, þá fari þessi kaleikur frá mér, þó ekki sem ég vil, heldur sem þú vilt".  Matteus 26:39b

En hann harkaði af sér og lét þessa hugsun hverfa sér úr huga.  Hann var handtekinn og dæmdur til dauða, húðstrýktur og þyrnikóróna sett á höfuð hans, og hann bar kross sinn upp á Golgatahæð, þar sem  hann var krossfestur.  Hann gerði þetta allt vegna þín til þess að þú mættir eignast eilíft líf í gegnum trú á hann.

Skuldabréfið varð að greiða.  Guð varð að láta son sinn koma og deyja fyrir þig, til að greiða skuldabréfið vegna synda þinna.  Þannig varð að fullnægja öllu réttlæti.  En þú þarft að taka á móti þessari gjöf.  Í Biblíunni, Guðs orði stendur:  "því að svo elskaði Guð heiminn, að hann gaf son sinn eingetinn, til þess að hver sem á hann trúir, glatist ekki heldur hafi eilíft líf."  Jóhannesarguðspjall 3:16

Tak á móti Jesú Kristi.

Bjarni Benediktsson ætti ekki að segja af sér.

Varðandi það að Bjarni Benediktsson hafi lýst því yfir að hann ætli að íhuga hvort hann eigi að víkja til hliðar sem formaður Sjálfstæðisflokksins, vil ég segja þetta: 

Bjarni ætti ekki að segja af sér formennsku Sjálfstæðisflokksins, hann ætti að muna að það er fólk sem stendur á bak við hann og treystir honum til að leiða flokkinn farsællega.  Það eru þeir sem ljáðu honum atkvæði sitt á Landsfundi Sjálfstæðisflokksins og við hin, þar á meðal sá sem þetta skrifar, sem finnst honum fyllilega treystandi til þess að leiða Sjálfstæðisflokkinn, í gegnum næstu kosningar og vonandi taka þátt í æðstu embættum næstu ríkisstjórnar.

Bjarni ætti ekki að taka of alvarlega könnun MMR.  Ég held að raunveruleg ástæða fyrir fylgistapi Sjálfstæðisflokksins sé ekki vegna persónu formannsins heldur vegna tilboðs Framsóknarflokksins varðandi flata niðurfærslu húsnæðislána heimilanna.

Bjarni var löglega endurkjörinn á Landsfundi flokksins í nóvember 2011, þegar Hanna Birna Kristjánsdóttir bauð sig fram gegn honum.   Bjarni  hlaut  55% atkvæða en Hanna Birna rúm 44%.    Í ljósi þess fylgis ætti hann að halda ótrauður áfram.  Það mundi, held ég valda óánægju og ólgu í flokknum meðal stuðningsmanna hans og ekki bæta ímynd flokksins ef skipt væri út formanni svona rétt fyrir kosningar.

Mér finnst Bjarni vera ákveðinn og kjarkmikill stjórnmálamaður sem mundi verða þjóð sinni til mikils gagns og landi sínu til sóma, ef hann yrði valinn í æðsta embætti komandi ríkisstjórnar.

 

Við  Bjarna Benediktsson vil ég segja þetta:  Harkaðu af þér, og láttu þessa hugmynd um að segja af þér formennsku hverfa úr kollinum á þér.  Við Sjálfstæðismenn og fólkið í landinu þurfum á þér að halda!

 

Við þá sem horfið hafa yfir frá Sjálfstæðisflokki yfir til Framsóknarflokks með fylgi sitt, vil ég segja þetta: Er grasið nokkuð grænna hinum megin?  Er ekki Sjálfstæðisstefnan sú besta, heimilunum og atvinnulífinu til hjálpar, í þeim mikla öldudal sem þjóðin er í núna?

 

Og við landsmenn vil ég segja þetta:  Setjið X-ið við D-ið í næstu kosningum!

 

Að lokum vil ég segja að Jesú Kristur er besta svarið Íslandi og heiminum til handa.  Hann gaf líf sitt svo að við mættum lifa.  "Því svo elskaði Guð heiminn, að hann gaf son sinn eingetinn til þess að hver sem á hann trúir glatist ekki, heldur hafi eilíft líf".  Og að "Guð sendi ekki soninn (Jesú Krist) í heiminn ekki til að dæma heiminn, heldur til að heimurinn skyldi frelsast fyrir hann".  Jóhannes 3:16,17.

Óvissa um framtíð Bjarna