Sigmundur Davíð einn af betri stjórnmálamönnum í sögu lýðveldisins.

Háttvirtur forsætisráðherra, Sigmundur Davíð Gunnlaugsson var endurkjörinn formaður Framsóknarflokksins á flokksþingi í gær.  Fékk hann 98,2 prósenta gildra atkvæða sem á reyndar engum að koma á óvart því hann hefur sýnt fram á að hann er einn af meiri stjórnmálaskörungum sem Ísland hefur alið.  Má þar nefna að hann og ríkisstjórn  hans ýtti úr vör skuldaniðurfærslu til handa almennings með stökkbreytt íbúðalán.  Fjárhagur ríkisins og kaupmáttur fólks hefur tekið mikið stökk upp á við. Er nú svo farið að launþegar eru farnir að sjá að menn eru komnir í brúna (Sigmundur og Bjarni) sem komið hafa þjóðarskútunni á ágætt skrið. Sést það á því að umsemjendur launþega og félög þeirra hafa undanfarin misser verið að tala um launahækkanir sem skipta tugum prósenta.

Nei það skal engan undra að Sigmundur Davíð fékk endurkosningu upp á 98.2 prósent.  Slíkur er hugurinn í honum og atorkan.  Skoðanakannanir undanfarið sem sýnt hafa lítið fylgi flokks hans 11 prósent þurfa ekki að þýða mikið.  Skoðanakannanir sýna fylgi upp og niður eftir því hvað ríkisstjórnir eru að takast á við í það og það sinnið, en ríkisstjórnin hefur verið að taka á erfiðum málum sem krefjast mikillar ígrundunar eins og sjávarútvegsmálin sem eru mjög vandmeðfarin.  Svo hefur stjórnarandstaðan staðið fyrir nokkurri gagnrýni á ríkisstjórnina og samflokksmann Sigmundar, háttvirtan Utanríkisráðherra í tengslum við Evrópumálin.  En eins og kunnugt er dró Gunnar Bragi umsókn Íslands að ESB til baka með bréfi til formanns ráðherraráðs ESB.  Þessi gagnrýni stjórnarandstöðunnar og ESB fylgjandi fjölmiðla er ekkert nema stormur í vatnsglasi.  Það er enginn skaði skeður fyrir Íslendinga, síður en svo.  Hafa þingmenn Samfylkingar og hinir vinstri flokkarnir, því þeir hafa óvænt snúist á sveif með Samfylkingunni í þessum áróðri, látið þau ummæli falla að þjóðin skuli fá að neyta réttar síns og skuli fá að kjósa um áframhald aðildarviðræðna.  En það er hvílík fásinna að það nær engu tali.  Að sjálfsögðu er hér ekki um eiginlegar umræður eða samningaferli að ræða heldur aðlögun og innsetning og tilskipun laga frá Evrópska stórveldinu.  Mættu Íslensk þjóð varðveitast frá því að flækja sig í Evrópu- og Evru samstarfinu.  Því það er bágt efnahagsástandi í mörgum ríkjum ESB sem margir vilja kenna Evrunni um, og mikið atvinnuleysi sérstaklega á meðal ungs fólks, svo mikið að við Íslendingar höfum aldrei kynnst öðru eins. 

Sigmundur og flokkur hans hafa líka staðið vörð um Stjórnarskrá lýðveldisins, en vinstri flokkarnir vilja breyta henni til að auðvelda hugsanlega inngöngu í Evrópusambandið, og einnig til að fá úr gildi tekin lög um tengingu ríkis og kirkju.  En það er mikilvægt að Íslenska ríkið styðji áframhaldandi við Kristna trú og kirkju og meti hana sem órjúfanlegan hluta af Íslensku þjóðlífi, efli hana og að hún verði áfram hluti af starfi hins opinbera með launagreiðslum til presta og fleiri þjóna hennar. Mætti Framsóknarflokkurinn og hinn stjórnarflokkurinn, Sjálfstæðisflokkurinn standa vörð um kristin gildi og hafa kristin viðmið og kristin gildi í heiðri höfð í gerðum sínum og flokkssamþykktum.

Kær kveðja.

Sigmundur Davíð endurkjörinn formaður

Athugasemdir

[Jónas Ómar Snorrason, 12.4.2015 kl. 11:11]

Hvaða stjórnmálamenn finnst þér þá betri en SDG?

[Steindór Sigursteinsson, 12.4.2015 kl. 12:23]

Komdu sæll Jónas.  Ég átti við að hann er einn af bestu stjórnmálamönnum að mínu mati sem komið hafa upp á sjónarsviðið, hafði ég ekki endilega í huga að einhver annar væri honum fremri.  Því hann hefur komið fram miklu framfara máli fyrir marga Íslendinga sem niðurfærsla höfuðstóls íbúðalána er og skipar hann sér því að mínu mati í sess með stórhuga stjórnmálamönnum sögunnar eins og Matthíasi Bjarnasyni sem var sjávarútvegsráðherra 1974-1978 gaf út reglugerð að fiskviðilögsagan yrði færð út í 200 mílur.  Slíka menn ber að hafa í heiðri fyrir störf þeirra í þágu þjóðar sinnar.  Að sjálfsögðu met ég Bjarna Benediktsson formann Sjálfstæðisflokksins mjög mikils þar sem ég er sjálfur Sjálfstæðismaður, og vegna þess að hann hefur stuðlað að bættum hag ríkissjóðs og reynir að ná haldi á hag og stöðugleika íslensks efnahagslífs á tímum mikilla sviptinga vegna krafna um stórbætt kjör launþega.  Bjarni og Sigmundur voru að sjálfsögðu nýliðar í rísisstjórnarsetu ásamt fleiri samráðherrum þeirra þegar þeir tóku við völdum, en ég trúi að þeim vaxi æ ásmegin og læri betur og betur að halda um stjórnvölin á Íslensku þjóðarskútunni.

[Steindór Sigursteinsson, 12.4.2015 kl. 12:34]

Bjarni átti að sjálfsögðu ekki annars kost en að koma til móts við kröfur lækna með töluvert bætt laun.  Því landflótti blasti við í greininni og ófermdarástand á spítulunum og heilbrigðisstofnunum var vegna manneklu.  Það er því ekki upp á hann að sakast að þeir lægst launuðu vilji fá verulega bót á sínum kjörum.  Það var ekki í boði að hafna kröfum lækna um bætt kjör slíkt hefði aðeins viðhaldið vandamálinu varðandi landflótta lækna, einkum núýtskrifaðra.