Bloggfærslur mánaðarins, apríl 2014

Ríkisstjórnin ætti ekki að gugna á ákvörðun sinni um slit á aðildarviðræðum við ESB.

Eins og fram kom í frétt á mbl.is tjáði Birgir Ármannson, þingmaður Sjálfstæðisflokksins og formaður utanríkismálanefndar Alþingis sig á þá leið að hann teldi ólíklegt að þingsályktunartillaga háttvirts utanríkismálaráðherra um að afturkalla umsókn Íslands að ESB verði afgreidd á þessu þingi.  Jafnframt kom fram að sögn Einars K Guðfinnssonar, forseta Alþingis að engin áform séu uppi um sumarþing.

Mig langar til að segja:  Er ríkisstjórnin nokkuð að gugna í ákvörðun sinni að slíta aðildarviðræðum við ESB ?  Það hefur farið mikið fyrir fréttaflutningi í fjölmiðlunum upp á síðkastið að nokkrir þingmenn Sjálfstæðisflokksins hafa gerst nokkuð djarfir í málflutningi sínum, þar sem þeir lýsa því yfir að ríkisstjórninni beri að hætta við fyrirhuguð viðræðuslit og að Íslandi sé best borgið innan ESB.  Eru jafnvel uppi áform um að stofna nýjan stjórnmálaflokk með það að meginmarkmiði að koma Íslandi inn í Evrópusambandið, og það án þess að formaður hefði fundist sem leitt gæti slíkt framboð. Yrði slíkur flokkur klofningur úr Sjálfstæðisflokknum ásamt öðrum sem fylgjandi eru inngöngu í ESB.

Ég vona að ríkisstjórnin, einkum sá hluti sem heyrir undir Sjálfstæðisflokkinn sé ekki að láta orð ESB -fylgjandi þingmanna Sjálfstæðisflokks og áróður ESB -hlyntra fjölmiðla, slá sig út af laginu eða láta hræðslu við áform um stofnun nýs ESB miðaðs stjórnmálaflokks stjórna gerðum sínum.

Það er nefnilega þannig, að sú staðreynd að Íslandi sé ekki vel borgið innan ESB stendur enn óhögguð, ekkert hefur breyst í þeim málum.  Það er augljóst orðið að sá efnahagsdoði sem einkennt hefur ESB -ríkin, einkanlega Evruríkin hefur ekkert batnað upp á síðkastið.  Sagt hefur verið af mörgum sérfræðingum sem fjallað hafa um þetta mál að ástæðan fyrir að ríki ESB fóru ver út úr kreppunni en mörg önnur ríki heimsins sé gjaldmiðillinn þeirra, Evran.  Og að ekki sjái fyrir endann á efnahagslægðinni hjá evruríkjunum.  Það er staðreynd að atvinnuleysi er mikið í Evru- löndunum 18, en það er að meðaltali 12%, en á Spáni er það 26%.  Við Íslendingar stöndum því mjög vel að velli, með um 4,5% atvinnuleysi.  En Íslenskt atvinnulíf og efnahagshorfur eru á mikilli uppleið. 

Er nokkur ástæða til þess að ganga inn í þá lágdeyðu sem ESB innganga myndi færa okkur inn í ?

 


mbl.is Óljóst hvort ESB-tillaga klárast
Tilkynna um óviðeigandi tengingu við frétt

Jesús dó og reis aftur upp frá dauðum.

Ég vil taka undir orð  Agnesar M. Sigurðardóttur biskups yfir Íslandi sem hún flutti í páskaprédikun sinni í Dómkirkjunni.  En hún sagði um Jesú Krist:  "Allt rættist það sem hann hafði sagt um örlög sín, enda hafði það verið skrifað í hans helgu bók. Hann reis upp á þriðja degi og sigraði þar með dauðann."  Orð þessi hafa verið ein af undirstöðuatriðum trúar okkar kristinna manna.  Biblían segir í I Korintubréfi 15:1-7:

"Ég minni yður, bræður, á fagnaðarerindi það, sem ég boðaði yður, sem þér og veittuð viðtöku og þér einnig standið stöðugir í.

Fyrir það verðið þér og hólpnir ef þér haldið fast við orðið, fagnaðarerindið, sem ég boðaði yður, og hafið ekki ófyrirsynju trúna tekið.

Því það kenndi ég yður fyrst og fremst, sem ég einnig hef meðtekið, að Kristur dó vegna vorra synda samkvæmt ritningunum,

að hann var grafinn, að hann reis upp á þriðja degi samkvæmt ritningunum

og að hann birtist Kefasi, síðan þeim tólf.

Því næst birtist hann meira en fimm hundruð bræðrum í einu, sem flestir eru á lífi allt til þessa, en nokkrir eru sofnaðir.

Síðan birtist hann Jakobi, því næst postulunum öllum."

Jesú Kristur reis upp frá dauðum á þriðja degi eftir dauða sinn.  Samkvæmt ritningunum voru rúmlega 500 manns vottar að upprisu hans.   Upprisan hefur gefið okkur kristnu fólki von í gegnum aldirnar, um að við fáum einnig að lifa og dvelja með Drottni Jesú á himnum eftir að lífi okkar hér á jörðu er lokið.  Biblían segir í I Korintubréfi 15:14:

"En ef Kristur er ekki upprisinn, þá er ónýt prédikun vor, ónýt líka trú yðar."

 En Guði sé lof, Kristur er upprisinn og það gefur okkur kristnu fólki von og tilgang með lífinu, að líf okkar taki ekki enda við dauða okkar og þess vegna beri okkur að útbreiða boðskap trúarinnar til annarra svo þeir mættu verða hólpnir.

Kær kveðja.


mbl.is „Lífið er sterkara en dauðinn“
Tilkynna um óviðeigandi tengingu við frétt

Kristin trú ætti að vera í hávegum höfð í grunnskólum landsins.

Mikið hefur verið rætt um kristnifræði og kristilega innrætingu í skólum landsins undanfarin ár.  Hafa vissir hópar fólks jafnvel beitt sér fyrir því að hætt verði að kenna kristnifræði í skólum eins og áður var, og kristnifræði verði aðeins lítillega kynnt ásamt öðrum trúarbrögðum heims.  Hafa þessir hópar sett sig í gegn öllum kristilegum áhrifum, eins og heimsóknum presta og Gídeonfólks, heimsóknir í kirkjur ofl.  Í kjölfar þess setti Reykjavíkurborg lög sem hömluðu mjög kristilegri innrætingu í skólum á Reykjavíkursvæðinu og bönnuðu heimsóknir presta, Gídeonmanna og annara boðbera Kristinnar trúar.  Hafa margir skólar á landinu, fylgt fordæmi þeirra.

Um þetta sagði Karl Sigurbjörnsson biskup meðal annars í viðtali við Kolbrúnu Bergþórsdóttur í Sunnudagsblaði Morgunblaðsins:   „Það er einfaldlega þannig að þegar fræðslu um trúarbrögð, trúariðkun og þátt trúarbragðanna í lífi og menningu er sópað undir teppi þá tekur fáfræðin við og fordómarnir fylgja í kjölfarið."

Margt fólk telur að Kristin trú eigi ekki upp á pallborðið í leik- og grunnskólum, að hún sé aðeins byggð á gamaldags hugmyndum sem eiga ekki lengur við  í lífi fólks í dag.  En sannleikur málsins er sá að Kristin trú á aldrei betur við nú á þessum tímum.  Kristin trú kennir okkur góð og uppbyggileg gildi, eins og kærleika til náungans, miskunnsemi og langlyndi til handa samborgurum okkar.  Kristin trú kennir okkur að bera hag náungans fyrir brjósti, einkannlega þeim sem hafa það bágt.  Þjóðkirkjan rekur eins og kunnugt er Hjálparstofnun Kirkjunnar þar sem hún útdeilir mat til þeirra sem búa við kröpp kjör.  Hún styður einnig við fólk í öðrum löndum sem býr við örbyrgð.  Fjölmargar aðrar hjálparstofnanir sem byggðar eru á kristinni trú eru líka með margvíslegt hjálparstarf bæði innanlands og utan.

Karl sagði ennfremur:  „Ekki verður annað séð en að það sé að koma á daginn að þegar leitast er við að þvinga hið trúarlega undir yfirborðið og þagga niður, eins og mjög er tíðkað á Vesturlöndum, líka hér á Íslandi, þá fer ýmiss konar ofstæki að bæra á sér á ólíklegustu stöðum undir lítt geðþekkum formerkjum," 

Þegar dregið er úr kristilegum áhrifum og innrætingu í skólum dregur úr þekkingu barna á landinu á því sem kristin trú boðar.   En það er áhersla á hófsemi og lítillæti og að elska náungann eins og sjálfan sig.  Þegar hætt er að benda á kennslu Biblíunnar sem grunn að góðu lífi og réttlæti þá fyllast börnin meira rótleysi, og tilgangsleysi gerir vart við sig í lífum þeirra.  Það á líka við okkur sem eldru erum, öll höfum við þörf fyrir orð Guðs.  Er það skoðun mín eins og Karl Sigurbjörnsson sagði, að þegar boðskapur Krists er minna sýnilegur í þjóðfélagi okkar þá eykst ýmiskonar ofstæki á ýmsum sviðum.  Getur það birst í ýmsum myndum, eins og óeðlilega hörð viðbrögð og mótmæli gagnvart stjórnvöldum, fordómar gagnvart útlendingum, ófriður við annað fólk sem hefur ekki sömu skoðanir og jafnvel fordómar gagnvart kristnu fólki.  En Biblían kennir okkur að halda frið við alla menn, eins og okkur er unnt og á okkar valdi, og að við eigum ekki að hefna okkur, né koma illa fram við nokkurn mann.

Ég vil nota tækifærið til að biðja stjórnendur grunnskóla að styðja við að börnin fái að heyra orð Guðs og leyfi prestum og Gídeonfólki og fleiri boðberum Kristinnar trúar að boða börnunum fagnaðarerindið.  Því Jesús sagði:  "Leyfið börnunum að koma til mín, varnið þeim eigi, því að slíkra er Guðs ríki."

Kær kveðja.

 


mbl.is Trúnni sópað undir teppi
Tilkynna um óviðeigandi tengingu við frétt

Sorglegt að á Íslandi sé fólk sem vill vinna kirkjunni tjón.

Um klukkan fimm aðfaranótt skírdags var eldur lagður að kirkjuhurð Akureyrarkirkju og er hún hugsanlega ónýt.  Er leitt til þess að vita að hér á landi sé fólk sem valda vill tjóni á kirkjubyggingum.  Er þetta því leiðinlegra í ljósi þess að þetta var nóttina fyrir byrjun páskahátíðarinnar þegar Kirkjan heldur upp á, og heiðrar þjáningu Frelsarans og dauða hans á krossi.

Núna á föstudeginum langa þegar páskar eru í hönd er vert að minnast þess sem Jesús Kristur gerði fyrir okkur.  Hann hafði verið svikinn af einum lærisveina sinna, Júdasi Ískaríot.  Vinir hans, hinir lærisveinarnir höfðu yfirgefið hann vegna hræðslu, að þeir kynnu líka að verða handteknir og þeim refsað ef þeir reyndu að koma honum til hjálpar.  Hann hafði verið yfirheyrður af öldungaráði lýðsins, æðstu prestunum og fræðimönnunum sem dæmdu hann dauða sekann.  Þeir fengu lýðinn til að samþykkja að hann yrði krossfestur þegar Pontíus Pílatus vildi bjóða þeim að hann yrði settur laus í stað Barnabasar sem var ræningi.  En það var hefð fyrir því hjá Pílatusi að frelsa einn bandingja á páskunum. 

Við þekkjum flest frásögnina hvað gerðist eftir það.  Hann var hýddur með gaddasvipu höggin 40, þyrnikóróna var sett á höfuð hans.  hann var látinn bera kross sinn til Golgatahæðar en hann kiknaði undan byrðinni og maður að nafni Símon var látinn bera kross Jesú síðasta spölinn til aftökustaðarins.  Þar á Golgatahæð var hann krossfestur, Rómverskir hermenn ráku nagla í gegn um hendur hans og fætur og síðan var hann látinn hanga á krossinum.  Eftir nokkurn tíma, um nón gaf hann upp andann.

Jesú Kristur gerði þetta allt fyrir okkur.  Hann vildi að við fengjum í gegnum fórnardauða hans,  eilíft líf og fyrirgefningu synda okkar.  Hann gerðist staðgengill fyrir okkur.  Við áttum skilda refsingu fyrir það illa sem við höfðum gert, en hann tók á sig refsingu okkar.  Hann býður okkur öllum að koma til sín og trúa á hann og fá hjá honum fyrirgefningu syndanna og eilíft líf.  Jóhannes postuli segir svo fallega í guðspjalli sínu:  "Því að svo elskaði Guð heiminn að hann gaf son sinn eingetinn til þess að hver sem á hann trúir, glatist ekki heldur hafi eilíft líf."  Jóh 3:16.  

Hugleiðum það sem Jesús Kristur hefur gert fyrir okkur, núna um páskahátíðina.


mbl.is Kirkjuhurðin líklega ónýt
Tilkynna um óviðeigandi tengingu við frétt

Þrengt að einkaframtakinu og einkabílnum í deiliskipulagi fyrir þéttingu byggðar í Reykjavík.

Það hefur farið mikið fyrir umræðum í fjölmiðlum upp á síðkastið um fyrirhugaða þéttingu byggðar í og við miðborg Reykjavíkur.  Er stefnan sú að almenningssamgöngur og reiðhjólið fái meira vægi í umferðinni í miðborginni.  Er það ætlun Borgarstjórnar að þétta byggð, fækka bílastæðum en auka á sama tíma aðgengi reiðhjóla svo fólk geti nýtt sér betur þann umhverfisvæna ferðarmáta.  Eru það einkum þrjú svæði þar sem byggð verður þétt, er það Vatnsmýrin, Elliðavogur og svæðið við gömlu höfnina.  Hætt hefur verið við umferðarmannvirki eins og mislæg gatnamót, götur hafa verið þrengdar.  Er þetta gert í þeirri trú að almenningur muni draga úr notkun einkabílsins en nýta sér þess í stað strætó eða að bregða sér á reiðhjól. 

Stefnt er að lokun svonefndra Fluggarða með allri starfsemi sem þar er, en reisa þar íbúðabyggð þar sem verða meðal annars stúdentaíbúðir og reiðhjólastígar, svo nemendur í HÍ geti hjólað í og úr skóla.  Í miðbænum hefur ma verið þrengt að kaupmönnum þar með lokun hluta Laugarvegarins og Skólavörðustígarins fyrir akandi umferð á sumrin og hafa bílastæðagjöld verið hækkuð.  Talað er um að áætlun Borgarstjórnar sé ekki þétting byggðar heldur þrenging byggðar, því þrengt er að íbúum vesturhluta borgarinnar og lífsgæði þeirra skert í sumum tilvikum.  Hið nýja borgarskipulag nýtist yngra fólki best sem ekki er með fjölskyldur, því almenningssamgöngur henta yfirleitt ekki fjölskyldufólki.  því vinnutími er yfirleitt langur hjá fjölskyldufólki og það er þess vegna oft í kapphlaupi við tímann að koma börnunum sínum á milli skóla eða í tómstundir eða að versla og að bíða eftir strætó og fara með honum langar leiðir er ekki fýsilegur kostur.  Það er alls ekki tímabært að fólk fari í stórum mæli að hætta að nota einkabílinn en snúi sér þess í stað að almenningssamgöngum og reiðhjólanotkun.

Er ætlun Borgarstjórnar að smátt og smátt að yfirtaka Reykjavíkurflugvöll fyrir íbúða og atvinnubyggð.  Er yfirtaka fluggarða á næsta ári, fyrsta skrefið í þá átt.  En þar eru reknir nokkrir flugskólar, minni flugfélög og einkaflugmenn eru þar allmargir með vélar sínar.  Lítið sem ekkerti hefur verið haft samband við þinglýsta eigendur fasteigna á svæðinu og ekki hefur verið fundinn staður undir þessa starfsemi.

Í vor verða sveitarstjórnarkosningar, þá hafa Reykvíkingar færi á að velja þá frambjóðendur sem fara vilja með málefni deiliskipulags Reykjavíkurborgar af skynsemd og leyfa Reykjavíkurflugvelli að vera áfram aðalsamgönguhlekkurinn við landsybggðina og þyrma lífvænlegum atvinnugreinum eins og flugkennslu og flugi. Ásamt því að gæta hófs í þéttingu byggðar með lífsgæði íbúa Reykjavíkur og atvinnumöguleika í huga.

Með kærri kveðju.


Lokun Reykjavíkurflugvallar snertir þjóðarhag og þjóðaröryggi.

Það er að koma sífellt betur og betur í ljós í fréttum fjölmiðla hversu skaðleg lokun Reykjavíkurflugvallar yrði.  Bæði fyrir flugfélög þau og flugskóla sem hafa aðsetur á vellinum ásamt einkaflugmönnum og ekki síst fyrir alla landsmenn, þar sem flugtími frá landsbyggðinni til Reykjavíkur mun lengjast til muna.   þetta mun koma niður á buddu landsmanna fyrr eða síðar þar sem ferðir til annarra landa munu hækka töluvert í verði vegna tæknilegra örsaka í tengslum við missi á varaflugvelli.  Fargjöld innanlands munu hækka töluvert.  Er jafnvel talað um að vart verði grundvöllur fyrir innanlandsflugi verði Reykjavíkurflugvöllur lagður niður. 

Ég held að ég þurfi ekki að fjölyrða um hver áhrif það hefði á flugnámið ef flugskólarnir yrðu að hafa sig í burtu frá Reykjavíkurflugvelli á næsta ári.  Slíkt væri hvílik holskefla fyrir þessa atvinnustarfsemi.  Enginn flugvöllur sem stenst kröfur varðandi góðan kennsluflugvöll er á næsta leiti. Hætta væri á að þeir hreinlega legðu upp laupana og að flugnemar þyrftu að leita út fyrir landssteinana með flugnám, með stórauknum kostnaði því fylgjandi, ásamt hugsanlegum samdrætti í hópi þeirra sem hyggja vilja á flugnám.

Það þykir sjálfsagt í stórborgum úti í heimi að flugvellir séu inni í stórborgum.  Eru þess dæmi jafnvel svo nokkur hundruðum skiptir.  Nálægð flugvallar við Landsspítala sem á vonandi eftir að vaxa og auka húsakost sinn er ákaflega mikilvægur.  Sagt hefur verið að rekstur þyrlu sé 6-8 sinnum dýrari en vængjavélar.  Reykjavíkurflugvöllur er einnig mikilvægur ef til eldsumbrota kemur á Reykjanesinu ef hraun rynni yfir Reykjanesbraut.

Ég vil segja að það eru miklar ógöngur sem borgarstjórn Reykjavíkur er að koma landsmönnum út í, ásamt flugfélögum og flugskólum. 

Mér finnst að leiðin út úr þessu sé að ríkisstjórnin taki af skarið og taki opinbera afstöðu í þessu máli og leiti leiða til þess - hreinlega að leggja lögbann á þessar aðgerðir Reykjavíkurborgar.  Þetta mál er þess eðlis að ekki leikur vafi á því að hér er á ferðinni mál sem snertir þjóðaröryggi og þjóðarhag.  Og ef farið verði út í þessar aðgerðir mundi það valda margvíslegum skaða á flugsamgöngum og skapa hættu bæði hvað varðar náttúruhamfarir á Reykjanesinu og koma í veg fyrir eðlilegt sjúkraflug á Reykjavíkursvæðinu.

Með kærri kveðju.

 


mbl.is Fargjöld munu hækka
Tilkynna um óviðeigandi tengingu við frétt

Óskiljanlegt skeytingarleysi gangvart blómlegri atvinnugrein og eignarrétti fólks.

Það er ljóst orðið að borgarstjórn Reykjavíkur hefur fastráðið að hefja niðurrif á svæði svonefndra Fluggarða á Reykjavíkurflugvelli á næsta ári og byggja þar íbúðabyggð.  Var það mál ákveðið með samþykkt deiliskipulags sem samþykkt var síðustu viku.  Vilji borgaryfirvalda stendur til að Reykjavíkurflugvöllur víki alfarið úr Vatnsmýrinni í framtíðinni og að þetta verði fyrsta skrefið í þá átt.

Mér finnst þessi ákvörðun Borgaryfirvalda alveg óskiljanlegt skeytingarleysi gagnvart þessari starfsemi sem þarna fer fram og skilningsleysi viðkomandi á þeim skaða sem þetta mun valda, á þessari blómlegu og vaxandi atvinnugrein sem Flugskólarnir eru.  Í flugskóla þá sem eru á Reykjavíkurflugvelli sækjast að jafnaði töluverður fjöldi erlendra flugnema.  Er það vegna þess að kostnaður við flugnám er tiltölulega lágur hér á landi í samanburði við það sem gerist í öðrum löndum.  Í Íslensku flugskólunum er rekin metnaðarfull kennsla með góðu starfsliði og tækjakostur hefur farið vaxandi eins og með tilkomu flugherma, er það til að gera Íslenska flugkennslu fyllilega samkeppnishæfa við það sem best þekkist.  Einn flugskólinn hefur starfað í yfir 50 ár með góðum orðstýr.   Á svæðinu eru líka rekin nokkur minni flugfélög og fjöldi einkaflugmanna hefur þar aðstöðu fyrir vélar sínar í flugskýlum sem eru á svæðinu.

Má nú segja að starfsemi þessi sé í hættu vegna skammsýni Borgaryfirvalda og eiginhagsmunastefnu að hugsa aðeins um að skapa rými fyrir íbúðabyggð, sem vel mætti vera staðsett annars staðar.  En á sama tíma að leggja eigur viss hóps manna og hagsmuni tveggja atvinnustétta sem þarna starfa í rúst.    Á ég varla orð til að lýsa vanþóknun minni á fyrirhuguðum aðgerðum Reykjavíkurborgar og trega minn vegna þessa fólks sem hefur rekið þessa mikilvægu flugstarfsemi á svæðinu, með góðum efnahagslegum áhrifum á landsvísu.  Er það vegna starfsemi, minni flugfélaga með bættum samgöngum við landsbyggðina og vegna ýmsrar tengdrar þjónustu eins og skoðanir og viðhald á flugvélum, sala á varahlutum ofl.

Það þarf ekki að fjölyrða um það hversu mikill skaði það yrði fyrir flugskólana og verðandi flugmenn ef flugkennsla leggst af á Reykjavíkurflugvelli.  Reykjavíkurflugvöllur er alveg kjörinn fyrir flugnám, stærð hans og umferð sem um hann fer, er alveg kjörin fyrir einka- og atvinnuflugs nám.  Það væri alvarlegra en orð fá lýst ef flugnám leggist að mestu leiti niður á Íslandi og verðandi flugnemar yrðu að leita fyrir sér erlendis með flugnám.  Það mundi leiða til þess að verðandi flugmönnum mundi stór fækka, því er nefnilega þannig farið að nærvera við flugvöll, Flugdagar þeir sem haldnir eru á Reykjavíkurflugvelli og starfsemi flugskóla hafa laðað að sér margan manninn til að leggja í flugnám.  Og margir menn og konur hafa smitast af flugbakteríunni, einmitt við það að fara í kynningarflug hjá einhverjum flugskólanna.  Er nokkuð yndislegra og meira spennandi en að svífa um loftin blá í flugvél? 

Ég vil hvetja Borgaryfirvöld í Reykjavík að endurskoða þessa ákvörðun sína með hagsmuni þessara starfstétta sem hafa lifibrauð sitt á svæðinu í huga og með þá blessun sem starfsemi flugskóla hafa á flugið í landinu.

Með kærri kveðju.


mbl.is Reykjavík besti kennsluvöllurinn
Tilkynna um óviðeigandi tengingu við frétt

Óréttlætanleg eignaupptaka á aðstöðu einkaflugmanna, flugskóla og minni flugfélaga.

Það hefur varla farið fram hjá neinum að Reykjavíkurborg hefur ráðgert að taka yfir landrými það á Reykjavíkurflugvelli, sem nefnast "Fluggarðar".  Er það svæði þar sem einkaflugmenn, Flugskólar og nokkur minni flugfélög hafa aðstöðu og flugskýli fyrir flugvélar sínar.  Í síðustu viku samþykkti Reykjavíkurborg deiliskipulag, þar sem gert er ráð fyrir að Fluggarðar víki fyrir annarri byggð strax á næsta ári.

Ég á varla orð til að lýsa vanþóknun minni á fyrirhugaðri aðgerð Reykjavíkurborgar að flæma burt þeirri starfsemi sem þarna þrífst, með eignaupptöku og niðurrifi á flugskýlum og öðrum fasteignum einkaflugmanna, flugskóla og flugfélaga.  Er þetta niðurrif að ég tel algjörlega ólöglegt þar sem Reykjavíkurborg hefur lítið sem ekkert samráð haft við þinglýsta eigendur mannvirkja á svæðinu og hyggst ekki greiða þeim bætur. Hér er verið að ýta þeim flugrekstraraðilum sem hlut eiga að máli og einkaflugmönnum út á kaldan klakann.  Á svæðinu eru að jafnaði 85 flugvélar vistaðar í flugskýlum sem telja alls um 8000 fermetra, og að starfsemi þeirri sem fer fram á svæðinu koma nokkur hundruð manns.  Enginn flugvöllur kemur til greina fyrir starfsemi þessa, Keflavíkurflugvöllur getur ekki tekið við flugnáminu og einkafluginu, þar sem flug lítilla flugvéla og stórra þotna passar ekki saman.  Þar sem mikil hætta skapast á árekstrum milli kennsluvéla og farþegavéla að maður tali ekki um öfluga hvirfla sem stórar flugvélar skapa sem geta skapað mikla hættu fyrir einkaflugvélar.

Reykjavíkurflugvöllur er eins og kjörlendi fyrir flugskóla, því hér er  um að ræða flugvöll mjög vel tækjum búinn og með hæfilegri umferð flugvéla sem gera flugnámið meira krefjandi.  Að setja starfsemi flugskóla á lítinn flugvöll eins og á Selfoss eða á Hellu mundi gera námið mjög einhæft og takmarkað hvað varðar þjálfun í talstöðvarsamskiptum og maður talar nú ekki um vöntun á ýmiskonar aðflugs- og flugleiðsögu tækjum sem fyrirfinnast á stærri flugvöllum ásamt flugturni með flugumferðarstjórn.  En það er nauðsynlegt fyrir flugnema sem hyggja á áframhaldandi nám með atvinnuréttindum.

Ég vil hvetja borgarstjórn Reykjavíkur til að hætta við fyrirhugað niðurrif á Fluggörðum.  Sú starfsemi sem þarna fer fram er mikið þjóðhagsmuna-mál með hundruðum starfsfólks sem þarna hefur lifibrauð sitt.  Þetta er ekki aðeins niðurrif á einhverjum byggingum til þess að hægt sé að reisa þar íbúðabyggð heldur er hér um stærra og víðfeðmara mál að ræða.  Það er hætta á að starfsemi flestra flugskóla á Íslandi hreinlega þurrkist út.  Það er á engan annan stað að venda fyrir þá flugrekstraraðila sem þarna eru og einkaflugmenn í Reykjavík.  Á þessi sjónarmið ber Reykjavíkurborg að líta.  Ef Reykjavíkurborg hættir ekki við fyrirhugaðar aðgerðir á þessu svæði er það skoðun mín að Ríkisstjórninni beri að leggja lögbann á þessar aðgerðir.  Því hér eru hagsmunir á ferðinni sem snerta hag allrar þjóðarinnar.

Kær kveðja.

 


mbl.is Enginn vill einka- og kennsluflugið
Tilkynna um óviðeigandi tengingu við frétt

Skýrsla Alþjóðamálastofnunar tilgreinir ekki heimildarmenn og er án heimildarskrá.

Í fréttatímum Stöðvar 2 og Rúv var fjallað um skýrslu Alþjóðamálastofnunar Háskóla Íslands.  Var þar fullyrt að Íslendingar mundu sennilega komast hjá því að fiskveiðiskip ESB myndu veiða í Íslenskri lögsögu þrátt fyrir inngöngu Íslands í ESB og að Íslendingar kæmust hjá því að erlendir aðilar fjárfestu í Íslenskum sjávarútvegsfyrirtækjum.  Var sagt að upptaka Evru myndi stórauka hag landsmanna og að kostirnir við upptöku Evru vægju þyngra en ókostirnir.

Vigdís Hauksdóttir þingmaður og formaður Heimssýnar gagnrýndi skýrslu Alþjóðastofnunar HÍ.  Sagði hún hálfsannleik koma þar fram og að í raun sé þetta "skýrsla óþekkta embættismannsins" þar sem vitnað er í nafnlausa embættismenn ESB og tveggja manna tal.  Sagði Vigdís að í skýrslunni komi fram að ósamstaða hafi verið í fyrri ríkisstjórn og ekki hafi verið hægt að opna ýmsa viðræðukafla vegana fyrrverandi sjávarútvegsráðherra, Jóns Bjarnasonar.

Ég vil segja að þessi skýrsla virðist ekki vera mikið mark á takandi vegna þeirra annmarka sem á henni eru;  að ekki er vitnað í hverjir innan ESB hafi tjáð sig og að sögn Vigdísar var engin heimildaskrá sem fylgdi skýrslunni sem fylgja þarf ef skýrsla á að vera vel og faglega unnin.  Vigdís sagði líka að komið hafi fram í skýrslunni að ástæðan fyrir því að ekki var hægt að opna ýmsa viðræðukafla væri vegna fyrrverandi Sjávarútvegsráðherra Jóns Bjarnasonar og sagði  hún það fjarstæðu að ætla núverandi ríkisstjórn sem er á móti inngöngu í ESB að halda viðræðunum áfram. 

Vil ég taka undir með Vigdísi að skýrsla þessi virðist ekki faglega unnin þar sem vitnað er í ónafngreinda embættismenn innan ESB og að tilvitnanaskrá vantar.  Skýrsla Hagfræðistofnunar Hí var hins vegar mjög fræðilega og vel unnin, þar kom fram að engar varanlegar undanþágur eða undanþágur sem máli gætu skipt fyrir Ísland væru í boði.

Kær kveðja.


mbl.is Skýrsla óþekkta embættismannsins
Tilkynna um óviðeigandi tengingu við frétt

Sköpun jarðar og sannleiksgildi Biblíunnar.

Þessir vídeó þættir mynda hluta úr sögu Ísraels frá upphafi sköpunar, til daga Ísraels, til daga Jesú og síðan til okkar daga þar sem Jesús starfar á meðal okkar í dag.

1. Sköpun Jarðar. Í upphafi skapaði Guð Himin og Jörð. Í þessum vídeó þætti rekur Kent Hovind Ph.D. sannanir fyrir því að Jörðin sé ung nokkur þúsund ára gömul, sem styður það að Guð skapaði Jörðina eins og Biblían segir frá og að Jörðin sé þá ekki miljóna ára gömul eins og kennt er í skólunum og í sjónvarpsþáttum. Hvaðan komum við og hvert förum við, skiptir það máli?

Vídeó þættirnir heita: The Age of the Earth - Dr. Kent Hovind - Part 1 of Creation Science

Extraordinary Evidence that Dinosaurs Lived with Man - Dr. Don

Living Dinosaurs in Africa (Full Documentary)

The Demon Flyer Creature of Papua New Guinea (Documentary).

 

 

 

 2. Sódóma og Gómorra. Í þessum vídeó þáttum eru leifar af þessum borgum sýndar þar sem Biblían talar um að þær séu við Dauðahafið í Ísrael. Biblían segir frá því að Lot flýði úr Sódómu með konu sína og tvær dætur áður en Guð eyddi Sódómu, en þarna eru hólar og hæðir sem minna á byggingar, margar með 90 gráðu hornum sem kallast rétt horn, en þau eru að finna á manngerðum byggingum, og á sumum eru greinilega ferkantaðar glugga myndanir og þar eru líka op sem líkjast inngöngum í hús. Á þessu svæði er Jarðvegurinn aska og brennisteinn, en Biblían segir frá því að Guð hafi látið eld og brennistein rigna frá himnum þegar hann eyddi Sódómu og Gómorru.

Ron Wyatt lét efnagreina þennan brennistein og var hann 98% hreinn brennisteinn, en hann finnst í leifunum af öllum þessum borgum kringum Dauða hafið sem Guð eyddi og er þetta eini staðurinn á Jörðinni þar sem þessi 98% hreini brennisteinn finnst, en hann brann við 5000 - 6000 gráður á Fahrenheit sem er um 2700 - 3300 gráðu hiti á Celsius. Hann brann við þennan mikla hita vegna þess að hann inniheldur örlítið af Magnesíum málmi.

En hvað fundu fornleifafræðingar þegar þeir fóru að grafa í Sódómu ???  þeir fundu mannabein ofan í öskunni dreifð yfir allt vestur svæði Sódómu.Einnig hafa fundist um 1.000.000 grafir Kananíta á þessu svæði, en þeir voru íbúar þessa lands.                                                                                                                                                    

Vídeó þættirnir heita:  Revealing God's Treasure - Sodom & Gomorrah og

Sodom & Gomorrah Documentary. TRUE STORY.                                                                                                        

http://vimeo.com/69213153

 

 

3. Í gegnum Rauða hafið. Í þessum vídeó þáttum er eru sýndar leifar af vagnhjólum í á botni Rauðahafsins en Biblían segir frá því að Móses leiddi Ísraelsmenn sem voru þá kallaðir Hebrear út úr Egyptalandi en Faraó elti þá að Rauðahafinu með hermenn hervagna og Guð opnaði Rauðahafið fyrir Ísraelsmönnum þannig að þeir komust  þurrum fótum yfir í Súr-eyðimörk.

En hermenn Faraós fóru á eftir þeim og hafið steyptist yfir þá og þeir fórust allir, en eftir sitja leifar af vagnhjólum jafnvel úr gulli og einnig hafa fundist manna bein og hesthófar.

Vídeó þættirnir heita:  Revealing God's Treasure - The Red Sea Crossing

The Exodus Revealed og The Exodus 

http://vimeo.com/69234784

 

 

4. Sínaí fjall. Í þessum vídeó þætti er sagt frá dvöl Ísraelsmanna hjá Sínaí-fjalli sem er í

Sínaí-eyðimörk eins og Biblían segir frá. Ísraelsmenn gengu í gegnum Rauðahafið inn í Súr-eyðimörk og síðan til Elím þar sem voru 12 vatnslindir (Brunnar) og 70 pálmar en brunnarnir standa ennþá í dag og ennþá fleiri pálmar eru þar í dag. Þeir komu síðan að Sínaí-eyðimörk en fólkið möglaði gegn Móse. Móse sló þá staf sínum á klett einn, eftir boði Drottins, og spratt þá fram vatn úr klettinum. Í dag er að finna á þessum slóðum klett sem er klofin niður. Þar eru ummerki um að vatn hafi runnið niður frá klettinum.

Móses gekk upp á fjallið og fékk boðorðin 10 úr hendi Guðs, en þegar þá fór að lengja eftir Móse gerði Aron bróðir Móse þeim gullkálf og altari fyrir framan hann og Ísraelsmenn færðu Gullkálfinum fórnir. Í dag, við Sínaí fjall, er að finna steinahrúgu með myndum af kálfum sem þeir hafa teiknað, þar sem þeir hafa sennilega sett gull kálfinn á.  Engu er líkara en að toppurinn á Sínaí-fjalli sé í dag, sviðin eftir eldi og reyk, en Biblían segir frá því að Drottinn hafi stigið þar niður í eldi og að reykur hafi stigið upp frá því eins og úr ofni.

 Vídeó þátturinn heitir:  Revealing God's Treasure - Mt. Sinai

http://vimeo.com/69442209

 

5. Fornleifafræðingar grafa eftir sannleika Biblíunnar. Í þessum vídeó þætti sýnir

Dr. Don Patton frá fornleifafundum í Ísrael og í kringum Ísrael frá þeim tíma þegar Jósúa leiddi Ísraelsmenn inn í Kanansland eftir andlát Móse. En Móses leiddi Ísraelsmenn frá Egyptalandi, gegnum Rauða-hafið, yfir eyðimerkur og að Sínaí fjalli og áfram að Nebófjalli, þar sem hann lést eftir 40 ára veru í eyðimörkinni með Ísraelsmönnum. En Móses skipaði Jósúa eftir mann sinn sem síðan leiddi Ísraelsmenn inn í fyrirheitna landið Kanansland, sem síðan hét Ísrael. Í þættinum segir Dr. Don Patton frá því að sannanirnar fyrir því að Ísraelsmenn hafi verið í Egyptalandi fyrir 3400 árum og hafi farið yfir eyðimerkur, yfir ána Jórdan og inn í Ísrael, séu mjög miklar.

Þættirnir heita:   Archaeology: Digging for the Truth of the Bible og

Amazing Archaeological Discoveries Recently Made in Jerusalem

 

6. Sannanir fyrir tilvist Jesú. í  þessum vídeó þætti er fjallað um tilvist Jesú fyrir rúmum 2000 árum, að hann var dæmdur af Pílatusi og negldur á kross. Þeir sem skrifuðu um það voru Matteus og Jóhannes sem skrifuðu Mattheusar og Jóhannesar guðspjöll. Þeir voru sjónarvottar að lífi Jesú. Einnig Markús og Lúkas sem skrifuðu Markúsar og Lúkasar Guðspjöll, en þeir skrifuðu þau eftir vitnisburðum annarra samtímamanna Jesú. Einnig er fjallað um aðra menn utan Biblíunnar sem skrifuðu um krossfestingu Jesú. Þeir voru rómverskir og grískir sagnaritarar þeir minnast jafnvel á jarðskjálfta og myrkur sem var í Galíleu á þeim tíma sem Jesú var krossfestur. En Biblían segir frá því að það kom Jarðskjálfti og myrkur þegar Jesús var krossfestur um það er fjallað í kafla 2 í þessum þætti.   

 Vídeó þættirnir heita:   Historical Evidence for Christ and His Resurrection og

The evidence for the existence of Jesus-full length

http://vimeo.com/29511020

  

                                            .

7. Í þessum vídeó þætti er sýnt frá lækningum sem eiga sér stað í dag, að það eru lagðar hendur yfir fólk og beðið bænar í Jesú nafni til lækninga ýmissa sjúkdóma og meina sem fólk er að glíma við. Sumar af þessum lækningum eiga sér stað úti á götum eða inni í stórmörkuðum.

Í þessum þáttum kemur greinilega fram að Jesús læknar í dag ýmsa sjúkdóma sem fólk er að glíma við og fólk fær frið í sálina og frið í hugann.

 Vídeó þátturinn heitir:  Street healing with Tom Fischer Classic reactions to healing

  

 

                              Nokkur atriði sem styðja biblíulega sköpun.

8. Milliliðir eða Týndir hlekkir. Ekki hefur fundist einn einasti milli liður milli manna og dýra eða á milli dýra sem áttu að sanna þróunarkenningu Charles Darwin´s, um uppruna tegundanna, í þau 150 ár sem grafnir hafa verið upp steingervingar. Svo að þetta eru þá sannkallaðir tíndir hlekkir. Hversvegna eru þessir týndu hlekkir þá milliliðir í kennslubókum þar sem þróunarkenningin er kennd sem staðreynd ?" Charles Darwin skrifaði í bók sinni: Uppruni tegundanna, að ef það fyndust ekki neinir milliliðir milli manna og dýra eða á milli dýra þá væri kenning hans fallin.  

það er vídeó þáttur hérna fyrir neðan um þetta efni: There are no Missing Links! - Kent Hovind

 

9. Apamenn. Þessir svo kölluðu apamenn sem hafa fundist voru annaðhvort veikt fólk, sumir með hryggskekkju eða þá að falsaðar beinagrindur voru settar saman, jafnvel úr tveimur beinagrindum. Gott dæmi um þetta er Lucy sem átti að hafa verið með blendingseinkenni apa og manna, af tegund apa er kölluðust Sunnapar, þeir áttu að hafa veri uppi fyrir 2,7 til 4 milljónum ára. En beinagrindin úr henni var sett saman úr tveimur pörtum sem fundust með 1 1/2 kílómetra millibili.

Síðar var hún rannsökuð betur, þá kom í ljós að þetta var bara beinagrind úr apa.

það eru vídeó þættir hérna fyrir neðan um þetta efni:  

Dr. David Menton: Lucy--She's No Lady -- Clip  og  Dr. David Menton - Lucy she's no lady.

 

 

10. Steingervingar. Steingervingar af sjávar lífverum hafa fundist yfir alla Jörðina, í öllum löndum og uppi á hæstu fjöllum. En Biblían segir frá því að Guð hafa látið koma flóð sem náði yfir alla Jörðina, upp á hæstu fjöll, á dögum Nóa. Það má nefna að flestir steingervingar sem hafa fundist á liðnum 150 árum hafa fundist á lífi í dag, sjávar lífverur og landdýr fyrir utan útdauð dýr.

Það er vídeó þáttur á YouTube um þetta efni,

Það eru vídeó þættir hérna fyrir neðan um þetta efni: 

living fossils - dr. Carl werner, part 1 of 2 origins  og  Fossil Man - Dr. Don Patton.  

 

                                                                                                 

11. Jörðin. Jörðin hægir á sér, það er ekki mikið, en það er nóg til þess að ef við förum nokkur milljón ár aftur í tímann þá hefði Jörðin snúist hraðar, það hratt að hún hefði þeytt öllu frá sér út í geyminn þá hefði ekkert líf þrifist á Jörðinni. En þróunarkenningin á að hafa náð 3500 - 4000 milljón ár aftur í tímann.

Tunglið. Tunglið færist smátt og smátt frá Jörðinni, það er aðeins um 3 1/2 sm. á ári, en það er nógu mikið til þess að ef við förum 1 1/2 milljón ára aftur í tímann, þá hefði tunglið snert jörðina. En þróunarkenningin á að hafa náð 3500 - 4000 milljón ár aftur í tímann.

Sólin. Sólin minnkar um 5 fet á klukkutíma. Það er ekki mikið fyrir svo stóra stjörnu sem er um1.392.000 km (um 109 sinnum þvermál Jarðarinnar). En ef við förum 20 milljón ára aftur í tímann þá hefði Sólin verið svo mikill massi að hún hefði snert Jörðina.

En hvað haldið þið? þróunarkenningin á að hafa náð 3500 - 4000 milljón ár aftur í tímann.

það eru vídeó þættir hérna fyrir neðan um þetta efni: 

Our Created Solar System  og  Our Created Universe.

 

 Spurning ?" Ef til vill gleymist að hafa þessi 3 ofangreindu atriði með í útreikningum í sambandi við Þróunarkenninguna, en fyrstu bakteríurnar áttu að hafa myndast fyrir um 4000 milljónum ára, sem áttu síðan að hafa þróast í frumstæðar sjávar lífverur síðan í lindýr og fiska sem áttu síðan að hafa gengið á land og breyst í skriðdýr, síðan í önnur dýr, apamenn og síðan í menn.

12. Ernst Haeckel (1834-1919) var áhrifamikill þýskur vísindamaður. Árið 1866 birti hann kenningu um fósturvísa þar sem hann hélt því fram að fósturvísar dýra og manna væru nánast eins á frumstigum þeirra. Hugsunin á bakvið þessa kenningu var sú að fyrstu bakteríurnar og einfrumungar hefðu verið nánast eins fyrir 3500 - 4000 miljónum ára og fósturvísar dýra og manna hefðu haldist eins fram á daginn í dag. Þetta hljómaði vel í eyrum þeirra manna sem héldu því fram að allt líf hefði þróast frá bakteríum sem áttu síðan að hafa þróast í frumstæðar sjávar lífverur, síðan í fiska sem áttu síðan að hafa gengið á land og breyst í skriðdýr, síðan í önnur dýr, apamenn og síðan í menn. Gallinn við þessa kenningu Ernst Haeckel var að hann laug, hann falsaði þessar teikningar sem hann birti árið 1874. Það er óskiljanlegt að þessi kenning hans er enn í dag skólabókum.

það er vídeó þáttur hérna fyrir neðan um þetta efni:  Ernst Haeckel: 'An Embryonic Liar'  

Ég sýni hérna að neðan skýringarmyndir frá honum af fósturvísum sem hann teiknaði.

_cid_ii_1440e00617fd2b1a.jpg_cid_ii_1440e01d3d1d4800.jpgTil vinstri er upprunaleg skýringarmynd Haeckel og til hægri efst er skýringarmynd Haeckels

Til hægri eru myndir af fóstrum nokkura dýrategunda og mannsfóstri eins og þau raunverulega líta út.

Margir hafa spurt sig þeirar spurningar ef að Guð er til sem stjórnar öllu, af hverju er þá svona mikil illska á Jörðinni, þar sem stríð eru, þar sem þeir venjulega verða undir sem minna mega sín börn og konur, þar sem milljónir deyja í stríðsátökum sjúkdómum drepsóttum og hungri. 

Biblían segir frá því þegar Guð skapaði Jörðina í upphafi þá hafi allt verið fullkomið á Jörðinni, engin illska hafi verið, engin stríð, sjúkdómar, drepsóttir eða hungur. Biblían segir frá því að höggormurinn, sem var satan, hafi fellt Jörðina þegar hann freistaði Evu og ginnti hana til þess að borða af skilningstré góðs og ills og hún gaf manni sínum að borða með sér, og að Guð hafi bannað henni að taka af því og borða, ella mundi hún deyja. Eftir að þau borðuðu af skilningstré góðs og ills þá höfðu þau skin góðs og ills.

Biblían segir frá því að Guð bölvaði Jörðinni út af því sem þau gerðu, og satan fékk yfirráð yfir Jörðinni, og illska hans komst að þar sem stríð, sjúkdómar, drepsóttir og hungur komust að,

Biblían segir frá því að satan komi til þess að stela slátra og eyða lífi hvers mans.

Biblían segir frá því að Jesús kom í heiminn til þess að frelsa fólk undan yfiráðum satans í lífi hvers mans.

Þess vegna dó Jesú á krossi fyrir þig svo að þú megir öðlast frið í hjartað, svo að hann geti verið með þér á góðum stundum og slæmum, svo að hann geti leitt þig í gegnum erfiðleika og gefið þér eilíft líf með honum á himnum.

Spurning?" Villtu trúa því að lífið á Jörðinni hafi þróast og að maður lifi þessu lífi og deyi og verði grafinn og líf hvers og eins mans endi þá.

Eða villtu trúa því að Guð sá er Biblían talar um hafi skapað allt, Jörðina, himingeiminn og mannfólkið, að maður deyi og verði grafinn, og fari þá til himinsins þar sem Guð ríkir og maður verði með honum um eilífð ef maður hefur tekið við Jesú sem frelsara sínum.                                                

13. Hvað með fegurð, er það eitthvað sem Guð skapaði ? Eða hefur hugtakið fegurð þróast með manninum í milljónir ára ? Hér fyrir neðan er mynd af landslagi með fjöllum, trjám, firði, og í forgrunninum eru allskonar tegundir af blómum. Er þetta skapað af elskandi umhyggjusömum Guði Biblíunnar ? Eða hafa þessi fjöll, fjörður, tré og blóm á þessari mynd orðið til á milljónum ára ? Ég bið þá sem lesa þennan texta, að hugsa málið.

_cid_ii_1440e08d5a543060.jpg

Það er síða á internetinnu um fegurð hérna fyrir neðan:  Friday sunset.

fridaysunset.net/creation/beauty.html

Kannski léstu ferma þig og fórst með Trúarjátninguna og ef tilvill hefurðu gleymt því sem þú lofaðir, að fylgja Jesú Kristi og gera hann að leiðtoga lífs þíns.

Ef svo er farðu þá með Trúarjátninguna Upphátt eða í hljóði. 

TRÚARJÁTNINGIN

Ég trúi á Guð föður, almáttugan skapara himins og jarðar. Ég trúi á Jesú Krist, hans einkason, Drottin vorn, sem getinn er af heilögum anda, fæddur af Maríu mey, píndur á dögum Pontíusar Pílatusar, krossfestur, dáinn og grafinn, steig niður til heljar, reis á þriðja degi aftur upp frá dauðum, steig upp til himna, situr við hægri hönd Guðs föður almáttugs, og mun þaðan koma, að dæma lifendur og dauða. Ég trúi á heilagan anda, heilaga almenna kirkju, samfélag heilagra, fyrirgefningu syndanna, upprisu mannsins og eilíft líf, amen.

Biddu síðan Jesús að fyrirgefa þér það sem þú hefur ranglega gert (syndirnar), því að Biblían segir að allir menn hafi syndgað og skorti Guð dýrð.

Lestu Biblíuna og byrjaðu á Jóhannesar Guðspjalli síðan Postulasögunni og gakktu á Guðs vegum.

 


Innskráning

Ath. Vinsamlegast kveikið á Javascript til að hefja innskráningu.

Hafðu samband